“Gobernantza eraldatzen ari den munduan” izeneko ikastaroa emango du Sergio Garciak, soziologoa eta Gobernantza Demokratikoaren Institutuko ikertzailea. 2015eko urtarrilaren 28an eta 29an Aieteko Kultur Etxean izango da ikastaroa.
Gure gizarteek azken hamarkadetan jasandako aldaketa esanguratsuenak aztertuko dira ikastaro honetan, eta, halaber, gobernantza erara gobernatzea deitutakoaren giltzarriak azalduko dira. Era horretara, bi helburu beteko dira: bata, parte-hartzaileek errealitate soziala aztertzeko eta irakurketa egiteko gaitasuna areagotzea, eta, bestea, gobernantza kontzeptuak berekin daraman proposamena ulertzea. Bestalde, lidergo mota desberdinak identifikatzea da asmoa, bai eta egungo gizartean mugitzeko beharrezkoa den lidergo motan sakontzea ere: guztion zerbitzura bideratutako lidergoa.
Jakin-nahia duten pertsona helduei eta mundua hobetzen lagundu nahi dutenei zuzendurik dago ikastaroa. Donostia Kulturaren webgunean eta Aiete Kultur Etxean bertan izena eman daiteke. Ikastaroak 30€ balio du.
Saioak gaztelaniaz izango dira 2015eko urtarrilaren 28an eta 29an, 18:30etik 20:30era.
